تعرف على "ما هي قصة الوحمة التي في جسدك"

لو تلاحظ ان فيه فى جسمك وحمة او علامة مميزة موجودة فى منطقة معينة فى جسمك وانت فاكر انها حاجة عادية زى مابتطلع لأى حد ، بس الغريب فى الموضوع ان فيه علماء كتير وباحثين اثبتوا ان الوحمة او العلامة اللى فى جسمك دى هى عبارة عن سبب موتك فى الحياة السابقة ، بمعنى ان لو فيه بقعة فى بطنك فااا دة دليل انك اتقتلت فى الحياة السابقة بسكين او طلقة ، و دة اللى هوضحه اكتر فى القصة دى .. تناسخ الارواح يعني عودة الروح بعد خروجها من جسم الانسان لجسم طفل ، يعني الروح بعد ما تموت بترجع تاني تبدأ حياتها في جسم طفل بعد كام سنة .. الدروز والهندوس والصوفيّة اكتر حد بيؤمن بتناسخ الأرواح ، لكن في رأي تاني بيقول ان تناسخ الأرواح بيكون قرين المتوفي بيرجع تاني ويلبس الطفل فلما الطفل بيقول معلومات حصلت فعلاً بتكون حقيقية لأن القرين هو اللي بيبلغها ، هي عندنا كمسلمين بتكون تلبّس القرين مش تناسخ ارواح ، دة بكل بساطة تعريف تناسخ الأرواح .. تعود فكرة "تناسخ الأرواح" اللي بتقول أن ارواحنا أو انفسنا تبعث بعد الموت في جسد جديد وتستمر الى 3000 سنة على أقل تقدير وبعد كدة تموت الموتة الاخيرة ، و دة موضوع متجذر في ثقافات القدماء خاصةً في الهند واليونان وكمان الكهنة السلتيين ، في الواقع ان دى مش مجرد نظرية علمية أخترعها البشر حديثاً ، لأ هو معتقد ديني وفكري موجود في بعض الديانات ، على سبيل المثال البوذيين فاكرين أن الجسد يموت لكن الروح تبقى على قيد الحياة بتتولد من جديد في جسد حد تاني وتبدأ حياة جديدة ، وفيه ديانات تانية فاكرين أن الشخص الطيب لما بيموت بيتولد بجسد آخر وتبدأ حياة جديدة ، ولكن الشخص السيء اللي يسفك الدماء وبيعمل الحاجات اللى مش كويسة لما بيموت في الحياة روحه مش بتروح لجسد جديد ، بينزل للحياة على هيئة حيوان أو كائنات تعيسة ملهاش فايدة اطلاقاً !!! في سوريا (منطقة الجولان) كان في طفل عنده 5 سنين تقريبا بيحكي لامه وابوه عن حياته السابقة وكان دايما بيقولهم انه مات قبل كدة وكمان بيبقا عايزهم يروحوا للمكان اللي اتدفن فيه بعد وفاته ، وطبعا لأنه طفل صغير أهله كانوا بيقولوا ان الموضوع طبيعي يعني ، بس الطفل مسكتش وبقى يحكي الموضوع كل يوم لأهله وبقا يعيط ويقولهم على المكان اللي هو اتدفن فيه ، لحد ما عيلته قررت انها هتروح للمكان اللي هو بيوصفه ده وراح معاهم وفعلا وقف بيهم قدام ارض واسعة كدة وطلب منهم يحفروا هنا ، ولما الاهل حفرت في الارض اتصدموا لما لقوا جثة لشخص مجهول عبارة عن هيكل عظمي ، وقتها الطفل فرح وضحك وقالهم انه مات بضربة فأس على راسه ودة كان سبب الموت ، ولما الشرطة جت واستخرجت باقي الجثة من الأرض أكتشفت شئ مرعب..!! لقت فأس عليه أثار دم مدفون مع الجثة ، والغريب أكتر ان الطفل ده عنده وحمة كبيرة في راسه وبالتحديد في نفس المكان اللي أضربت فيه الجثة ، بعد ما الشرطة أخدت الجثة عرفت هي لمين ، وطلعت لشخص اسمه "ايلاي لاش"ولما الشرطة سألوا أهل منطقته ، قالوا انه مختفي من 4 سنين ومحدش يعرف هو فين ولا اي حاجة عنه ، والطفل مسكتش على كدة كمان لأ ده بلغ الشرطة عن القاتل وراح معاهم عشان يواجهوه ، وطبعا القاتل أنكر في البداية لأن الموضوع من 4 سنين وكان اتنسى اصلا بس الطفل وقف قدامه ، وبعد ما القاتل شاف الجثة والفأس اللي اثبت ان عليه بصماته بعد كدة أعترف .. طبعاً محدش متخيّل ان الحكاية دي حقيقية وفعلاً حصلت في سوريا ! فكرة تناسخ الأرواح تستمر لحد ما الشخص يمر بكل المراحل الصعبة والسهلة والمحزنة والسعيدة فى الحياة وتاخد الروح دورة كاملة وطويلة كلها عذاب مؤقت سعادة مؤقتة ، وفي ختام الدورة دى بتوصل الروح لمرحلة "النيرفانا" وهي تعني "السلام الروحي التام والخلو من المعاناة" ، لكن مفهوم تناسخ الارواح معقد وغريب شوية ، وللتوضيح بدقة أكتر "يعتبر الجسد مجرد قميص للروح والروح ترتديه وعندما يموت الإنسان، تترك الروح هذا القميص وعندها تنتقل الروح بسرعة لجسد جديد وربما الى زمان مختلف وعالم اخر عن الذي كان يعيش فيه .. كان فيه طفل اسمه "لوك" عنده ٦ سنين ، كان عايش مع ابوه وامه ، الاب والام كانوا دايما بيسمعوا من ابنهم حكايات غريبة ، حكاية بتتكلم عن ان الطفل "لوك" كان بنت سمراء البشرة اسمها "باميلا" وكانت البنت شعرها اسود وطويل ، و بتلبس حلقين على ودنها زي اللي امه بتلبسها ، كلام غريب جدا ، الام والاب اترعبوا من كلام ابنهم ، ازاي طفل يقول الكلام دة! ، جابه منين !! ، ازاي كان بنت سمراء البشرة ؟ ، الاطفال اه عندهم التخيل عالي ممكن يبنوا لنفسهم صديق خيالي لكن مستحيل التخيل هيوصل للشكل دة !! الاغرب من دة كله ان الطفل "لوك" قال لأمه أن "باميلا" ماتت وصعدت لربنا شافته ، بعد ما "باميلا" شافت ربنا ، ربنا طلب منها انها ترجع تاني كمولود جديد ويتسمى "لوك" ، استمرت غرابة القصة لما الاهل جابوا للطفل شوية صور لبنات سمراوات وقالوا للطفل اختار صورة ، الطفل اختار صورة لفتاة سمراء واتضح بعد كدة ان الطفلة اسمها "باميلا روبنسون" ماتت حرقًا في فندق سنة 1993 .. الام بتأكد ان ابنها بيحكى قصة حقيقية محدش حكاله عنها قبل كده ! فيه افكار بتقول "أننا مش بس بنعيش 100عام أو اقل وبنموت بعدها ، لا دة ممكن يعدى فى الحياة على زمن كامل بمعدل "10000" سنة وخلال الزمن دة جسدك يتبدل وتروح لحياة جديدة مختلفة عن حياتك السابقة بجسد جديد بتفاصيل جديدة وعائلة جديدة ووقت وزمان جديد وكل حاجة جديدة في كل مره .. فيه بنت اسمها "باربورا كارلن" من السويد ، البنت دى بمجرد ما بقا عندها 3 سنين بدأت تقول انها مش "باربورا" وانها اسمها "آن فرانك" ، وفضلت تحكي لاهلها احداث من حياتها السابقة وكان اهلها بيتضايقوا جدًا من القصص دي وبيقولوا انها اكيد قصص خيالية طفولية ، ولما كبرت بربورا كانت موهوبة جدًا ف الكتابة لدرجة انها نشرت 11 كتاب وهي عندها 16 سنة بس في السويد ، وأصدرت عام 2000 كتاب اسمه "وعوت الذئاب" ودة كتبت فيه قصة حياتها وقصة حياتها السابقة اللي هي "آن فرنك" ، وبعد بحث كبير قدرت تعرف باربورا ان آن فرنك من أمستردام وراحت هناك وهي عندها 10 سنين ولما وصلت لعاصمة "هولندا" لأول مرة بدأت ترشد اهلها لمنزل آن فرانك ، مع انها متعرفش المكان ولا البلد اصلا وراحت هناك وقدرت تدخل البيت وغرفة آن فرانك وفضلت تضحك وتقول ان كان في صور فنانين ومشاهير معلقة على الحائط وكانت فرحانة جدًا انها رجعت لمكان حياتها السابقة.. طيب مين هي "آن فرانك" ؟ دي بنت يهودية ألمانية ماتت وهي عندها 16 سنة تقريباً في حريق وكانت موهوبة جدًا ف الكتابة برضو.. وبعد ما باربورا قصتها اتشهرت رجع والد آن فرانك لبيتهم القديم في أمستردام ولقى مذاكرات لبنته فى نشرها في كتاب اسمه (مذكرات فتاة صغيرة) أو (the diary of a young girl) وبيُقال أن الكتاب دة عظيم وفي قصص حلوة وحزينه جدًا ، وكمان في دكتور نفسي اسمه "إيان ستيفنسون" درس قصة "باربورا" و2500 حالة كمان وراح اكتر من بلد في العالم عشان يتكلم مع الاطفال اللي بتقول ان ليها حياة سابقة ولحد دلوقتي البحث شغال في جامعة "فيرجينيا" على ايد دكتور اسمه "جيم تاكر" وكمان ستيفنسون نشر كتاب اسمه " الحياة قبل الحياة - life before life" ودة في دراسات وبحوث 50 سنة ، وقال أن الاطفال اللي ما بين ال3_5 سنين بيبدأوا في الكلام عن حياتهم السابقة وطريقة وفاتهم وقال أن القصص اللي بيقولها الاطفال دايما بتكون صحيحة وحصلت مع ناس ماتوا فعلاً ، دة غير ان في اطفال قدرت توصل لأفراد عائلتها في الحياة السابقة ، وقال كمان الدكتور ان الاطفال لديها بعض علامات عند الولادة تتطابق في مكانها مع جروح في أجسام الشخص المتوفي ، و دي نظرية الوحمة اللي ذكرتها فوق ، وأخيراً الدكتور عمل بحث في 6 من دول العالم وهما (لبنان والهند وسيريلانكا وتركيا وتايلاند وميانمار) ولحد دلوقتي البحث شغال مع ان الدكتور مات ومحدش وصل للسر .. في ناس بتقول ان مفيش حاجة اسمها تناسخ ارواح بس في قرين ، وبيقولوا ان قرين الانسان بيفضل عايش معاه وبيشوف كل لحظات حياته وبعد موته ، القرين طبعا مش بيموت وبيخرج من جسده وبيروح لجسد تاني وبيوسوس لصاحب الجسد ده وبيحكي ليه عن حياة الشخص السابق ودة اللي بيسبب في بعض الحالات لدخول الحياتين في بعض وظهور نظرية تناسخ الأرواح ، الكلام دة بيحصل مع الناس اللي بتموت في حوادث او ظروف مرعبة يعني في حريق او حادثة عربية او قتل ، وكمان وقتها بيفضل القرين عايش فترة في مكان الحادثة وعشان كدة الناس بتقول عليه مكان مسكون او ملبوس ، وبيكون القرين عارف كل حاجة عن حياة الشخص اللي مات ، وكمان القرين ده بيستفاد منه السحرة لما بتروح ليهم وبيقدروا يعرفوك ايه اللي هيحصل في حياتك .. فيه كمان بعض النظريات اللى حابب اوضحهالكم ودى اللى بتثبت فعلاً فكرة تناسخ الأرواح.. "الديجافو" هو أحساس بيخليك شايف الموقف قبل حدوثه وتشرح بأنك شوفت موقف حصل قدامك من نسج خيالك ، لكن يحصل فعلاً بنفس التفاصيل وكل شيء تصورته ، واحياناََ تحس أنك تعرف تفاصيل محصلتش او اماكن تحس أنك كنت فيها قبل كدة بس متعرفش امتى ، هل دة معناه أنك روحت الاماكن دى فى حياتك السابقة؟ "الذاكرة الوهمية" "ستيفن واغنز" تكلم عن ذكريات افتكرت بنته انها حصلتلها في طفولتها رغم أنها عارفة انها محصلتش خالص ليها ، وفي الواقع ذاكرة الانسان معرضة للوقوع في الخطأ والتضارب ويبقى السؤال المحير ، هل يمكن أن تكون الذاكرة الوهمية منقولة من الحياة السابقة ؟ "الكوابيس" فيه ناس فاكرة أن الاحلام والكوابيس مجرد امور يحدثها العقل وملهاش معنى ، وفي الأحلام المتكررة يشوف أنه يزور ويروح اماكن مشافهاش قبل كدة وبتفاصيل واضحة ومتكررة ، هل يمكن ان تكون الأحلام والكوابيس صدمات عشناها في حياتنا السابقة لكن ارواحنا تشبثت بها ولاحقتنا ؟ "الفوبيا" سألت نفسك قبل كدة منين جت مخاوفك اللي بتحس بيها ؟ زى الخوف من العناكب او الخوف من المرتفعات وبعض اشكال الفوبيا مش منطقية ابداََ ، زى الخوف من الماء ، حاولت قبل كدة أيجاد سبب مقنع لخوفك منه ؟! هل من الممكن انك تخاف من الماء بسبب أنك مت غرقاََ في البحر في حياتك السابقة ؟ "الانجذاب الى ثقافة أخرى" ممكن تكون عارف صديق او حد مقرب ليك اتولد وعاش طفولته في بلدك لكن عنده حب كبير لبلد تانى مراحهوش قبل كدة ويهتم بيه ، وحتى أنه بيلبس زى اللبس اللى بيلبسوه فى بلدهم وكمان بيقلدهم ، ممكن يكون سبب دة كله يعود بأنه في حياته السابقة عاش في البلد دى وترعرع فيها !! الاهتمام" حاجة كويسة أن يكون للإنسان أهتمام في حاجة يبدع فيها ، وبيكون أهتمامه في الفنون والموسيقى والموضة والتاريخ والعلوم التانية ، او كتابة قصص الرعب او الرسم ، وممكن يكون الاهتمام الشديد أحدى أهتمامات الاجساد اللي سكنت بيها روحك والاهتمامات دى بتبقى من اهتمامات الاشخاص اللي هم أنت في السابق .. "آلام لاتفسير لها" عمرك اتصابت فى حاجة او جالك مرض والعياذ بالله والدكاترة عجزوا عن معرفة سببها أو ألم لايوجد له تفسير طبي ؟ ممكن يعتبروك مصاب بوسواس او يقولولك مرض انت مش مصاب بيه ، وممكن تكون دى أنعكاسات عن اشكال المعاناة اللي تعرضت ليها في حياتك السابقة ! "الوحمات" دايماً بنقول على الوحمات انها دليل على تناسخ الارواح لأنها بتكون فى اماكن مختلفة من الجسم ، وتقول الفكرة أن الوحمة دى تعتبر تشوه وعلامات جسدية لك بحياتك السابقة ، والبعض يقول أنها المكان اللي تسبب بقتلك في حياتك السابقة.. سنة 1957 خرج بنتين من بيتهم عشان يروحوا لكنيسة قريبة من البيت في مدينة "ويتلي باي" ودي في شمال إنجلترا المهم البنتين دول وهما في الطريق للكنيسة لحضور قداس يوم الأحد جت عربية بسرعه جدًا وخبطتهم ومات البنتين ، البنتين دول هما "جوانا" 11 سنة و"جاكلين" 6 سنين ، بعد وفاة البنتين ابوهم ومراته مر عليهم فتره طويلة من الصدمة والزعل لدرجة انهم مكانوش مصدقين ان بناتهم ماتوا ، بس بعد الحادثة بسنة ونص بقا عندهم اتنين توأم بنات "جيليان وجينفر" وأبوهم وامهم من اول يوم ولادتهم وهما كانوا حرصين جدًا انهم ميجيبوش ليهم أي سيرة عن أخواتهم اللي ماتوا من سنة ونص ، بس الغريب ان جيليان وجينفر بمجرد ما وصلوا لسن 3 سنين وبقوا يتكلموا ذكروا لأهلهم كل تفصيلة دقيقة عن حياة أخواتهم اللي ماتوا قبل ولادتهم ! وبقت جينفر تقول انها جاكلين والمُرعب ان جينفر ظهر على جبينها من يوم والدتها أثر جرح كان في جبين أختها الميتة جاكلين لما العربية خبطتها يوم الحادثة ، وجيليان بقت تقول انها جوانا ، وكمان كان في شبه كبير جدًا بين التوأم والبنتين الميتين من خلال طريقة الكلام والحركات وكل حاجة حرفياً كأنهم نسخة من بعض ، ومش كدة وبس لا دة كمان جينفر وجيليان كانوا فاكرين يوم الحادثة وكل اللي حصل لأخواتهم في اليوم ده بالتفصيل وكأنهم كانوا موجودين مع ان ابوهم وامهم مذكروش ليهم اي حاجة عن اخواتهم اصلاً ، وكان عندهم عقدة من العربيات وكل ما يشوفوا عربية يصرخوا جامد ويقولوا "السيارة .. انها قادمة لتقتلنا" ، وفي يوم كانوا بيتفسحوا مع أهلهم ولما وصلوا للمكان اللي حصل في الحادثة قعدوا يعيطوا جامد وجينفر سألت والدتها وقالتلها: "ما الذي حدث للرجل جراء ما فعله بسيارته" ؟ وقعدت تعيط وتقولها أحنا كنا واقعين هنا وبننزف والدم بيخرج من دماغنا لحد ما روحنا طلعت فوق ، وفي يوم كمان لقت الأم بنتها جيليان قاعدة مع جينفر وبتحكي ليها تفاصيل دقيقة جدًا عن الجروح اللي حصلت لجاكلين بسبب الحادثة ، وبتقولها انا فاكرة شكل الدم وهو بيطلع من عينك الاتنين لما العربية خبطتك في دماغك وبتشاورلها على الجرح ! ولما قرر ابوهم يخرج العاب البنتين المتوفيين ويديهم للتوأم ، جريت بسرعة جيليان ومسكت لعبة على شكل عصارة غسيل وقالت لابوها "اخيراً شوفت لعبتي مره تانية" وأتصدم ابوهم اكتر لما لقى البنتين عارفين أسامي الالعاب !! وفضلت الحكاية زي ما هي لحد ما البنتين وصلوا لسن 6 سنوات اللي هو سن موت جاكلين وبدأت ذكرياتها عند جينفر تختفي ، ولما وصلوا لسن 11 سنة سن موت جوانا بدأت ذكرياتها تختفي عند جيليان .. بس تعرف بقى ان الاب مكنش بيؤمن بتناسخ الارواح اصلاً لانه كان كاثوليكي وبيتبع كنيسة روما وكان بينكر فكرة تناسخ الارواح بس بعد اللي حصل مع بناته صدق وآمن بالنظرية ، وقصة البنات دى أتشهرت جدًا ، انتوا شايفين الموضوع ازاي هل هو بجد فعلا ؟ ولا مجرد صدفة ؟! طب احنا ليه مسمعناش عن الموضوع دة فى مصر ، ليه بيحصل دايماً فى الدول اللى فيها الدين الاسلامى بسيط ؟ لأ يامعلم يبقى انت مسمعتش عن "دوروثي أيدي" .. 16 يناير سنة 1904 أتولدت بنت في لندن اسمها (دوروثي إيدي) وعاشت حياة طبيعية جدًا مع أهلها لحد ما وصلت لسن 3 سنين يعني في سنة 1907 ، حصل ايه بقي للبنت؟ البنت وقعت من على السلم على رأسها واتخبطت خبطة شديدة لدرجة ان قلبها وقف وحاولوا يفوقوها اكتر من مرة وفشلت كل المحاولات وبقت بشكل رسمي ميتة ، بس الغريب ان بعد ساعتين تقريبا البنت فاقت وخرجت من الاوضة وبقت تتحرك وتجري بشكل طبيعي و اكن مفيش اي حاجة حصلت ، ورجعت حياتها طبيعية تاني ، لحد ما وصلت لسن 4 سنين وبدأت البنت تنجذب للحضارة الفرعونية المصرية بشكل مش طبيعي لدرجة ان والدها خدها المتحف المصري البريطاني ، وبمجرد ما دخلت البنت وشافت اشكال التماثيل والمعروضات المصرية فرحت لدرجة انها وقفت قدام تمثال مصري وبدأت تبوس رجل التمثال دة وتقول ان دول أهلها ، بس طبعا اهلها قالوا ان دي لسة طفلة صغيرة واكيد مش فاهمة ومحطوش كلامها في دماغهم ، والموضوع عدى ومحصلش حاجة ، لحد ما البنت كبرت شوية وبدأت تحلم انها بتتمشى بين حدائق حواليها أعمدة غريبة من الصخر وبقت تشوف حياة تانية مختلفة تماماً عن الحياة اللي في عالمنا دلوقتي ، وفي البداية اهلها أقنوعها ان دة مجرد "اتصال روحاني" بينها وبين حياة الفراعنة مش اكتر ، بس لما كبرت دوروثي ووصلت ل20 سنة بدأت تدرس علم "المصريات" وقعدت تقريبا 5 سنين بتدرس فيه مع نفسها من غير ما تعرف اي حد من اهلها ، وفي سنة 1931 قررت انها هتسافر وتزور مصر وهنا عرفت واحد اسمه "إمام عبد المجيد" ودة كان استاذ انجليزي واتجوزته سنة 1933 وعاشت معاه في القاهرة وخلفوا طفل قررت دوروثي تسميه "سيتي" ودة أسم "فرعون مصري" في الاسرة ال١٩ ، المهم بعد فترة بدأت دوروثي تتصرف بشكل مُرعب يعني مثلا تقوم فجأة من النوم تمسك ورقة وقلم وتبدأ تكتب كلام "هيروغليفي" وكانت بتكتب اكتر من 70 صفحة وهي نايمة ومش حاسة بنفسها ، ولما سألها جوزها في مرة عن الموضوع دة قالتله انها بتستعيد الدليل الروحاني ليها عن طريق خادم اسمه "حور رع" بيجي ليها بالليل وبيساعدها في استرجاع ذكرياتها القديمة ، وقالتله انها كانت عايشة ايام الفراعنة واسمها "ودعا بنتريشيت" وانتحرت ، وطبعا لما عرف عبد المجيد حكاية مراته أنفصل عنها وسافر العراق وفضلت هي في القاهرة ، وقصتها أنتشرت جدًا وبقت معروفة بأسم "أم سيتي" لدرجة ان الصحافة اهتمت بالموضوع وقدرت تعرف قصة دورثي .. ايه هي قصتها بقى ؟! بتقول دوروثي انها "ودعا بنتريشيت" وكانت عايشة سنة 1279 قبل الميلاد في حكم "سيتي الاول" ولما بقا عندها 3 سنين ماتت والدتها ، ابوها مقدرش يتحمل مصاريفها وعاشت في معبد اسمه "كوم السلطان" وبقت كاهنة ، ولما تمت 12 سنة سألها الكاهن الاعلى وخيّرها بين انها تفضل كاهنة "عذراء" في المعبد او تنفصل للعالم الخارجي ، ووقتها قررت انها تكمل ككاهنة ، بس حصل بينها وبين الملك سيتي قصة حب وبقت حامل منه ، ولما عرف الكاهن الاعلى بالموضوع حكم عليها بالأعدام ، فقررت انها تنتحر بس سابت وصية للملك "سيتي" وقالتله انهم هيقدروا يتواصلوا تاني مع بعض في حياة تانية والملك سيتي كان بيحبها وقرر هو كمان انه هيعمل كدة ، وبتقول انها اتجسدت تاني في جسد "دوروثي لويز إيدي" .. طبعا انت تفتكر ان الحكاية دى مش واقعية صح ؟! لو انت فاكر كدة أحب اصدمك واقولك ان دوروثي قالت للعلماء على اكتر من مكان كانت بتعيش فيه وبعد الحفر والتنقيب تحت الارض كانوا بيلاقوا الاماكن دي موجودة فعلا زي ما وصفتها بالظبط ، وقدرت توصل العلماء لآثار ومعابد آثرية كتير جدًا مكنش حد يعرف عنها حاجة ، وساعدت هيئة الآثار الانجليزية في مصر على اكتشاف اكتر من جنينة وحديقة ومعابد ، وكل الحاجات دي كانت بتحلم بيها دوروثي وبتروح تقولها للعلماء ، وقدرت توصلهم لنفق تحت الحدائق كانوا بيتجمعوا فيه ووصلتهم لمكتبة خاصة فيها كتب كتير جدًا كانت للكهنة والفرعون ، وحكتلهم حاجات عن ابو الهول مكنش حد يعرفها ، ودوروثي حققت اكتر من شئ خرافي ، لدرجة ان دوروثي أتعملها قرية سياحية جنب "معبد سيتي" وبقا السياح تيجي من كل مكان في العالم تتصور معاها ويسمعوا حكايتها المُرعبة وفضلت دوروثي عايشة هنا لحد ما ماتت 21 أبريل 1981 ، الغريب فى الموضوع ان كل علماء الآثار والدكاتره النفسيين صدقوها ومحدش فكر انه يكذبها ولو لمرة .. من حوالى ٢٠ سنة تقريباً طلع الدكتور "إيان ستيفنسون" دة أستاذ الطب النفسي ورئيس قسم الطب النفسي في جامعة فيرجينيا ، وقال انه درس اكتر من 3 آلاف حالة ليها علاقة بتناسخ الارواح من خلال ابحاثه في دراسة مشتركة مع المجتمع العلمي ، وجاب كمان 210 طفل واستخدم تقنية التعرف على الوجوه عشان يحلل الشبه بين الاطفال دول والاشخاص اللي ميتين والمفروض متجسدين في جسد الاطفال ، ولقى ان نسبة الشبه فوق ال90% وكمان لقى ان 35% من الاطفال دول عندهم "عيوب و تشوهات" خلقية مرتبطة بجروح مع الاشخاص اللي هما بيفتكروا حياتهم في الحياة السابقة ، وقال "ستيفنسون" ان العيوب دي بتظهر عند الاطفال من لحظة الولادة وبتتطابق في مكانها مع جروح في جسد الشخص المتوفي ، يعني لو في واحد مات مقتول بطعنة سكينة وعنده جرح في بطنه ، الطفل اللي بيتولد بيبقا عنده نفس علامة الجرح في شكل وحمة ، وجاب الدكتور "ستيفنسون" الاطفال دي وخلاهم يحكوا ذكريات عن حياتهم السابقة بس بشرط يتكلموا ما بين 30ل40 كلمة بس ، وبعدها أتحقق من كلامهم والنتائج كانت أن 92% من البيانات كانت صح !! وبعدها قال "ستيفتسون" هو وشوية علماء أن تناسخ الارواح ظاهرة حقيقية ومثبتة عملياً .. احنا لحد دلوقتى مذكرناش كلام الدين ايه في الموضوع ! اختلف كتير من أهل الدين حوالين تفسير آية: " إنَّ الَّذِينَ كَفَرُوا بِآيَاتِنَا سَوْفَ نُصْلِيهِمْ نَارًا كُلَّمَا نَضِجَتْ جُلُودُهُم بَدَّلْنَاهُمْ جُلُودًا غَيْرَهَا لِيَذُوقُوا الْعَذَابَ ۗ إِنَّ اللَّهَ كَانَ عَزِيزًا حَكِيمًا " فى سورة النساء وفيه كمان مذاهب زي الدروز والشيعة بتؤمن بالتناسخ وبتقول ان الروح بتنتقل عند الموت من جسم آدمي لجسم آدمي آخر ، بس عندنا في مذهب أهل السنة بنحرم التناسخ وفي نفس الوقت في أختلاف على تفسير بعض الآيات زي الآية اللي فوق بس في المُجمل بنحرم نظرية تناسخ الارواح ، والمسيحية برضو بتحرم تناسخ الارواح ، والمثال قصة ألعازر والغني ، واليهودية بتؤمن بالتناسخ ، بس في شوية تفسيرات ظهرت زي تفسير القرين .. والتفسير بيقول ان لما الشخص بيموت نتيجة أنتحار او حادثة القرين بتاعه مبيموتش وبيخرج من جسده وبينتقل لجسد شخص تاني لسة مولود وبيبقا بشكل عشوائي ، وهو عشان بيبقا عاش مع الشخص المتوفي وعارف كل أحداث حياته وأدق التفاصيل فيها بينقل الاحداث دي للشخص المولود الجديد عن طريق الأحلام ، والتفسير دة في ناس كتير جدًا بتؤمن بيه وممكن ناس منكم تشوفه منطقي شوية .. حوار تناسخ الارواح دة من أكتر المواضيع الغريبة في العالم عشان فيها فكرة "اننا عشنا في الماضي وسنعيش مجدداََ في حياة أخرى مستقبلاََ" .. ناس كتير اتكلمت عن الموضوع دة والحوار كله مش من تأليفى بس ، انا آه تعبت فى ترتيب احداث الموضوع والبحث والتعمق فيه بس كمان هيجى ناس اكتر تتكلم عنه برضو ، نرجع لموضوعنا الاصلى ونسأل السؤال المهم .. هل فعلاً بعد الموت حياتنا هتتولد فى اجساد جديدة؟ وهنعيش حياة جديدة ؟ الصراحة انا سايبلكم حرية التعبير فى الرأي.